Dät rakt wier n näi seelter Läid!!! Dät Läid kumt fon Wortsatia, n Band uut deensk Fräislound. Hier konnen jie dät Läid here:
Die Titel is 'die goude koolde Wiin'. Ju Skrieuwwiese ('Wiin' instede fon 'Wien') wude bewust bruukt uum so ne Oard 'oolde Skrieuwwiese' uuttoudrukken. Ju Melodie fon't Läid is uk gjucht oold, ju kumt fon dät franske Drinkläid 'Tourdion' uut't 15. Jierhunnert.
Die Läidtäkst lät so:
Die goude koolde Wiin
Hey die goude koolde Wien, moaket alles kunterkunterbunt sik trale
Kum mäd uus un skoank ien, skoank dän gouden Wien
Kum mäd uus un skoank ien, skoank dän gouden Wien
Fierje, sjungt un drinkt un lät uus de Wienbieker loosmoakje
Sjungt un drink dän Wien, drink dän gouden Wien
Sjungt un drink dän Wien, drink dän gouden Wien
Ju Uutsproake fon 'skoank' is 'sjonk'. Dät mai wese, dät ju Band ju oolde Skrieuwwiese 'schoank' lesen hiede un dät 'sch' as n düütske sch uutboald häd. Uum dät sch-Uutsproakprobleem loos tou wäiden wude uum't Jier 2000 ju Skrieuwwiese 'sch' in 'sk' ferure.
