Dät näie Jier is begonnen: ´Säls Näijier´ wonskje iek aal! Iek häbe nu äntelk Tied uum mie wät moor ientousätten foar mien grote Hobby: do fräiske Sproaken. Fergene Jier, dät is nu bloot een poor Wieken häär, häbe iek heerd dät ju Publikation fon´n Grüffalo (ap Düütsk: Grüffelo) wier aan Stap wieder is. Uur do Details kon iek noch niks fertälle, man dät mai dit Jier fillicht angunge.
Foar mie sälwen häbe iek ferskedene litje Uursätprojäkte ap Seeltersk. Monges moakje iek dät bloot foar mie. Mäd de Tied mai et weze dät et Kafka-Projäkt ap Seeltersk gratter wädt. Knu häbe iek in Ju Fräiske Stämme, ju Tiedskrift fonne Jungfräiske Mäinskup, ju seelterfräiske Uursättenge fon´n Koopmon publisiert. Apstuuns bän iek mäd dän Hungerkunstler tougoang. Dät is fuul Oarbaid un iek häbe mäd Familie, Fultiedoarbaid, Ferene, unsofäre nit fuul Tied. Ou un tou häbe iek uk eenfach neen Lust, of skäl dät an´t Januoarmound läze?
Foar ju Jungfräiske Mäinskup wol iek dit Jier uk noch wät remäntje. In Wäästfräislound bän iek in´n Foarstound, wier iek bloot Biesitter bän. In Aastfräislound bän iek twäide Boas un deer investierje iek moor Tied. Dälich häbe iek noch mäd do uur Foarstoundljudene boald. Wie häbe dit Jier een Masse foar. So skäl et KI ap Aastfräisk Plat reke, wie wollen wät foar junge Ljudene moakje, wie wollen dän 26. Januoar noch wät in Hartwarden moakje, wie wollen noch insen een Tiedskrift moakje, wie häbe noch Aktivitäte foar dät Oostfräisk Instituut un dan rakt et uk noch ju Hälgeloundraize, Upstalsboom un Warns. Iek kude Fultied foar ju Jungfräiske Mäinskup oarbaidje...
Dan rakt et uk noch ju flugge seelter Sproake. Naist Uursätprojäkte moakje iek iek Kuurse foar grote Ljude. Dit Jier is aan Skrieuwkuurs ploand. Appe näie flugge Websiede fon´t Seeltersk-Kontoor stoant dät iek dän Kuurs touhope mäd Veronika Pugge moakje. Moal insen kiekje wo sinful et is, twäin Koastere ientouploanjen. Ap´t ljoofsten wüül iek noch aan Skrieuwkuurs foar ´Fortgeschrittene´ moakje. Mäd Literatuur, Idioom, Uursätteräi un Gjuchtskrieuwenge. Iek toanke, wie bruke moor Ljudene, do eenfach goud skrieuwe konnen.
Dät Jier is nu al tou kuut. ;-)
